NAKUUSAp Meeqqat isummersorfii tallimanngornermi Naalakkersuisut Siulittaasuannut Múte B. Egedemut borgmesterinullu tamanut suli amerlanernik toqqissisimanartumik ataatsimoorfiusunik ornittagaqalernissamut sunngiffimmilu sammisassaqarnissamut innersuussutitik aalajangersaganngorlugu tunniuppaat.
Innersuussutit NAKUUSAmi Meeqqat Isummersorfiinit ukioq manna oktoberimi Meeqqat Ataatsimeersuartinneqarneranni suliarineqarput. Innersuussutini meeqqat ornittagassanik ataatsimoorfinnillu toqqissisimaffiginissaasaminnik kissaatiminnik oqariartuuteqarput. Ornittakkat toqqissisimanermik pilersitsisut inersimasullu qanilaartut meeqqat suleqatigalugit peqataatitsisumik sammisaqartitsisut amigaatigineqarput.
Meeqqat politikerunut oqariartuutaat imaappoq:
”Meeqqanut inuusuttunullu klubbinut, sunngiffimmi sammisassanut, ataatsimoorfiusunullu piffissamik, aningaasanik nukissanillu atuigitsi. Ornitsigut sunngiffimmilu sammisassanut pisariaqartitagut kissaatigullu pillugit oqaluqatigaluta.”
Naalakkersuisut siulittaasuata, Múte Bourup Egedep oqaatigaa:
”Eqqaarsaatigilluarsimallugit innersuussutissinnut qamanngaannit qujarusuppunga. Unneqqarippusi, sapiippusi, isummersuutisilu paasisinnaalluarpakka. Sapinngisarput tamaat atorlugu toqqissisimanerusumik inuuneqarusunnissarsi anguniassavarput. Neriorsorusuppassi innersuussutisi pimoorullugit tigugakkit. Qujaqqippunga eqqarsaatissinnik kissaatissinnillu avitseqatigigatigut.”
Meeqqat inersimasunut, angajoqqaatut akisussaasunut inersimasunullu allanut meeqqanik akisussaaffilinnut aamma innersuusiorput:
”Meeqqavit sunngiffimmi sammisai soqutigisarikkit tapersersuilluarlutillu,” ilaatigut meeqqat oqariartuutigaat, aammalu inersimasunut meeqqanut suliaqartunut, suliffeqarfinnut inuiaqatigiinnut aammallu meeqqanut inuusuttunullu allanut aamma innersuussusiorlutik.
Innersuussutit tamaasa uani takukkit
”Meeqqat ataatsimoorfinnut peqqinnartunut toqqissisimanartunullu pisinnaatitaaffeqarput, inersimasuusugullu taamaammat tamanna pingaartittariaqarparput. Nalunngilarpummi sunngiffimmi sammisassat meeqqat ineriartornerannut, timikkut tarnikkullu peqqissusaannut, ilikkariartorsinnaanerannut mianersuaalliortumik pissusilersornissamut, ass. atornerluinermut pinerlunnermullu pitsaaliuinermut pingaaruteqaqisut. Taamaammat meeqqat kissaataat tusaaniartigit taakkulu aallavigalugit iliuuseqarluta,” Aviaaja Pregaard, UNICEF Kalaallit Nunaanni, NAKUUSAmi Naalakkersuisullu suleqataaffiusumi suliniutinut pisortaq oqarpoq.
Innersuussutit Naalakkersuisut Siulittaasuannut Muté B. Egedemut Kommuneqarfik Sermersuullu borgmesterianut Avaaraq S. Olsenimut Hans Egedep illuani tunniunneqarpoq. Borgmesterit allat nittartagaq aqqutigalugu peqataallutik oqalugiarput.