Naalagaaffiit Peqatigiit Meeqqat Pillugit isumaqatigiissusiaat

NAKUUSAp suliai tamarmik Naalagaaffiit Peqatigiit Meeqqat Pillugit isumaqatigiissusiaannit aallaveqarput. Meeqqat Pillugit isumaqatigiissut nunarsuarmi meeqqanut 18-t inorlugit ukiulinnut tunngasuuvoq meeqqallu sapinngisamik pitsaanerpaamik meeraanissamut inersimasuunissamullu qulakkeerinnittussatut pilersitaalluni. Meeqqat Pillugit isumaqatigiissut artikelinik 54-inik imaqarpoq, taakkulu meeqqat tunngaviusumik pisinnaatitaaffiinut, ineriartornissamut pisinnaatitaaffiinut, meeqqallu aalajangeeqataanissamut pisinnaatitaaffianut siunnersuisuupput – kiisalu naalakkersuisunut, aaqqissuussanut, peqatigiiffinnut assigisaannullu isumaqatigiissutip malinniissaanut aamma siunnersuisuullutik.

Naalagaaffiit Peqatigiit Meeqqat Pillugit isumaqatigiissusiaannit Nalaagaaffiit Ataatsimeersuarneranni 1989-imi akuerisaavoq. Meeqqat Pillugit isumaqatigiissut nunani 192-ini atortussanngortinneqarpoq, taamatuttaaq Kalaallit Nunaat 1993-imi ilannguppoq Naalagaaffiit Peqatigiit Meeqqat Pillugit isumaqatigiissusiaannilu artikelit malinnissaat pisussaaffigilerlugit, taamaattumillu nunani atuutsilernissaa isumagissallugu.

Meeqqat Pillugit isumaqatigiissut nunanut pisussaaffilertunut suliaqarusuttunullu najoqqutassatut isiginiarneqassaaq.

Inatsisaanngilaq unioqqutitsinermi eqqartuussivikkut pillaanermik kinguneqarsinnaasoq. Naak isumaqatigiissutip unioqqutissimanerani nunat pillagaasinnaanngikkaluartut Naalagaaffiit Peqatigiit Meeqqat Pisinnaatitaaffiinut komitéqarput, taakkulu ukiut tallimakkaarlugit nunat 192-iusut isumaqatigiissumik atsiorsimasut nalunaarusiortarnissaannik pisussaaffeqarput. Komitép nunat Meeqqat Pillugit isumaqatigiissummik unioqqutitsisut isornartorsiorlugillu assuarisinnaavaat, qanorlu nunat pitsaanerusumik iliorsinnaanersut innersuusiussallutik. Nunani 192-ni tamani NGO’t, meeqqanik inuusuttunillu suliaqartut, nalunaarusiorsinnaaapput pisortatigoortumik nalunaarusianut illuatungiliuttunik, taakkulu Meeqqat Pisinnaatitaaffii komitéanut saqqummiunneqassapput, tassani nunat ineriartornerit suliniutillu nutaat saqqummiunneqassallutik.

Taamaammat pingaaruteqartorujussuuvoq NGO’t ukiut tallimakkaarlugit nalunaarusiortarnissaat, taamaasillutik Meeqqat Pisinnaatitaaffiini Komitét Kalaallit Nunaanni meeqqat pisinnaatitaaffiinik sulinerannut takusinnaaniassammata.