Ukiormanna Meeqqat Ataatsimeersuarnerannut ulloq 17. oktobarimi nunamit tamarmit meeqqat naapipput. Ukiormanna meeqqat sunngiffimmi suliassanut pisinnaatitaaffiinik periarfissaannillu sammisaqarnissaq meeqqat toqqarsimavaat.
Ullumikkut qarasaasiakkut toqqaannartumik ukiormanna Meeqqat Ataatsimeersuarneranni NAKUUSA-mi Meeqqat Isummersorfiinit meeqqat naapeqatigiimmata Naalakkersuisut siulittaasuat Múte Bourup Egede, nunatsinni borgmesterit arlallit, aamma Rasmine Hansen, MIO-ip, oqalugiarput.
Ataatsimeersuarnerup meeqqat sunngiffimmi sulianut pisinnaatitaaffeqarnerinut periarfissaannullu tunngasuussanera meeqqat ukiormanna aalajangiussimavaat.
”Sulianik ataatsimoorfinnillu, meeqqanut inuusuttunullu ornigarfiusartumik ukioqatitik amigaateqartut misigisaraat Meeqqat Isummersorfiini ilaasortat oqaluttuarput. Ataatsimoorfitsialannut, toqqissisimanarlutillu ilanngussuisunut pisinnaatitaaffik Meeqqat pillugit Isumaqatigiissummi artikelit 6 aamma 31 tunngasoorpiarput, taamaalillutik sapinngisamik pitsaanerpaarpaamik ineriartorsinnaaniassammata,” Kalaallit Nunaanni UNICEF-imi suliniutinut pisortaq Maliina Abelsen nassuiaavoq.
”Meeqqat atugarissaarnerannut, timikkut tarnikkullu peqqissusaannut, ilikkagaqarsinnaassusaannut, aammalu aarleqquteqarfittut ileqqorisanik pinaveersaarinermut, soorlu atornerluinermut pinerluttuunermullu sunngiffimmi suliat assorujussuaq pingaaruteqartuusut nalunngilarput. . Taamaattumik ataatsimeersuarnermi sunngiffimmi suliat sammisarinissaannik ukiormanna meeqqat toqqagaqarsimammata nuannaartunarpoq,” Abelsen nangippoq.
Meeqqat Ataatsimeersuarneranni politikerinut, angajoqqaanut, atuarfinnut, sullissisarfinnut, aamma meeqqanut inuusuttunullu allanut inassuteqaatinik arlalinnik meeqqat oqaasertalersuipput. Inassuteqaatit taakku ulloq 24. novembarimi nunatsinni politikerinut meeqqat saqqummiunniarpaat.
”Ukiormanna aamma meeqqat ataatsimeersuarnerannut, oqaaseqarsinnaallutillu isummaminnik saqqummiusisinnaaffiannut toqqammavissanik pilersitsisimanerput assorsuaq tulluusimaarutigaarput. Maannakkut meeqqat ull. 24. novembarimi inassuteqaatiminnik saqqummiussilerpata nunami politikerit tamarmik tusarnaarnissaat kaammattuutigaarput,” Maliina Abelsen naggasiivoq.
Sunngiffimmi suliat atugarissaarnerlu pillugit piviusut
Sunngiffimmi suliarisani peqataaneq tassaavoq perorsarluagaanermi pingaarutilittut ilaasoq. Sunngiffimmi suliat aqqutigalugit meeqqat inuusuttullu ikinngutit pinngoriartortinnissaannut, inooqatigiiffimmi attaveqarfissanut, inooqatigiiffimmilu piginnaasanut periarfissanik pissarsisarput.
Aamma timikkut tarnikkullu peqqissutsimut sunngiffimmi suliani peqataasarnerit pingaartuupput. Taamaalillutik sunngiffimmi suliani peqataasarnerit kiserliornermut, aammalu aarleqquteqarfittut ileqqorisanut, soorlu aanngajaarniutinik atornerluinermut, pinaveersaartitsinertut sunniuteqarsinnaapput. Aaqqissuussaasutut sunngiffimmi suliani aamma atuarfimmi saqqummiussinerni peqataasarnerit akornanni ilorraap tungaanut ataqatigiissoqartoq misissuinerit arlallit takutippaat.
Sunngiffimmi suliat aqqutigalugit meeqqat inuusuttullu piginnaasanik, soorlu suleqatigiinnertut, attaveqaqatigiinnertut, aamma ajornartorsiutinik iluarsiinertut ittunik angusaqarsinnaapput. Tassaapput piginnaasat ilinniagaqarnermut, sulinermut, aamma inuiaqatigiinni peqataanermut pingaaruteqartut.
Najoqqutaq: ”Sosial ulikhet i barn og unges deltakelse i organiserte fritidsaktiviteter” (”Aaqqissuussarisatut sunngiffimmi suliani meeqqat inuusuttullu peqataasarnerini inooqatigiiffimmi naligiissuunnginneq”). Senter for forskning på sivilsamfunn og frivillig sektor’imit nalunaarusiaq, Norge.