Nuna tamakkerlugu meeqqat Meeqqat Isummersorfiineersut silap pissusiata allanngoriartorneranut ernummassutitik nunatta pokitiikeriinut annguppaat. Silap pissusiata allanngoriartornera pillugu suliniutillit inuusuttut aamma ajornartorsiutip qaangerniarnissaanut ulluinnarni qanoq iliuuseqarsinnaanersugut siunnersuuteqarput.
”Unikkallalaaritsi, oqariartuutigullu tusarnaarlugit. NAKUUSAp 2022-mi Meeqqat Ataatsimeersuarneranni Kalaallit Nunaat tamakkerlugu meeqqat 43-t Meeqqat Isummersorfiineersut katersorpaat. Tassani, nunatta siunissaasugut, Kalaallit Nunaanni silap pissusiata allanngoriartornera eqqartorparput. Eqqartukkagut naabba oqalugiaatinngortippagut tusarnaarnissarsilu kissaatigaarput. Pissuserisartakkat allanngortinnissat, uagut meeqqattalu inuuffissaqarnissaat, inuit tamarmik akisussaaffigaat.”
Ullumikkut meeqqat nuna tamakkerlugu Naalakkersuisumut Mimi Karlsenimut, Naalakkersuisumut Peter O. Olsenimut Naalakkersuisumullu Kalistat Lundimut oqalugiarnerat taama aallartippoq. Pingasunngornermi oqalugiaat nuna tamakkerlugu borgmesterinut anngunneqarpoq. Oqaluigaammi meeqqat silap pissusiata allanngoriartorneranut ernummatigisatik annguppaat; politiikerinullu – inersimasunullu tamanut – arlalinnik suaaruteqarput:
” Sikusarnera kingusinnerujartuinnarpoq, sermersuaq aakkiartorpoq, Kalaallit Nunaata Kangiani Piteraq sakkortusiartuinnarpoq, tamannalu assersuutigalugu uumasunut pinngortitarsuatsinnullu kinguneqarpoq. Bussit angallatillu innaallagiartortut atorsinnaavagut, biilinillu mingutsitsiinnarata cykelersinnaavugut pisuinnarlutaluunniit. Sooruna erngup anorip immallu nukingi innaallagissiornermi atornerunngikkigut? Sunaana utaqqiinnaripput?” meeqqat oqalugiaatiminni ilaatigut taama oqarput.