Kalaallit Nunaat tamakkerlugu ilinniartitsisut Sisimiuni katersuupput

Nuna tamakkerlugu illoqarfinni nunaqarfinillu ilinniartitsisut ullut marluk Sisimiuni NAKUUSAp ilinniartitsisunut seminareqartitsineranni katersuupput. Tassani atuartitsinerminni meeqqat pisinnaatitaaffiisa suliaqarfiginissaannut isumassarsiorput.

Qaanaamiit kujataani Tusiusamut, kimmut Aasiaat tikillugu. Ullut marluk nuna tamakkerlugu atuarfinnit ilinniartitsisut 39-t Sisimiuni ilinniartitsisut seminarerneranni katersuupput – tikillutik onlinekkullu.

”NAKUUSA ukiut aqqaneq marluk siorna pileqaarmalli aatsaat nunaqarfinniit seminartitsinermut peqataasoqarpoq. NUKAASAmi atuarfinnit soqutiginninnerujussuarmut, pimoorussinerujussuarmut peqataasoqarnerujussuarmullu qujamasuppugut”, UNICEF Kalaallit Nunaanni suliniutinut pisortaq, Maliina Abelsen, oqarpoq.

Seminareqarnermi ilinniartitsisut Naalagaaffiit Peqatigiit Meeqqat Pillugit Isumaqatigiissut aallavigalugu atuartitsinerminni Nakuusaaqqanillu suliaqarnissamut sakkussaqalerput. Ilaatigut meeqqat pillugit isumaqatigiissut assigiinngitsutigut atuartut ”pinnguarnikkut” suliassaqarnissaannik isumassarsiorput.

“Ilinniartitsisut seminarertinneqarneranni Tasiusami atuarfimmut uternissannut Nakuusaaqqat ingerlannissaannut isumassarsilluarlungalu paasisaqarluarpunga,” Regine Bidstrup, Tasiusap Atuarfia, Avannaata Kommunianeersoq oqarpoq.

Ilinniartitsisut aamma Sisimiuni pisinnaatitaaffinnik tunngavilinnik atuarfinnut marluusunut alakkaapput:

“NAKUUSAp ilinniartitsisunut seminareqartitsinerani maluginiarnerpaasara tassaavoq Sisimiuni atuarfinnut pisinnaatitaaffinnik tunngavilinnut alakkaanerput, tassanilu atuartut isummaminnik annissinissaminnut tunuarsimaannginnerat. Oqaasissaqarluarput, tamanullu apuukkusullugit,” Eva Grønvold, Nuussuup Atuarfia, Kommuneqarfik Sermersooq, nassuiaavoq.

Maliina Abelsenip, UNICEFimeersup, seminarip iluatsilluarnera nuannaarutigeqaa:

”Ilinniartitsisunut seminarertitsinerput nuannivippoq. Neriuppugut ilinniartitsisut suliaminnut tunngatillugu attaveqaatinik pitsaasunik pilersitsisimasut, taamaalillutik maannamit ilisimasaminnik avitseqatigiissinnaalerlutillu isumassarsioqatigiinneq NAKUUSAmeersuusugullu ingerlasinnaaniassammata,” naggasiivoq.

 

X