Ilinniartitsisunut seminarertitsineq
Ukiut tamaa NAKUUSA Nakuusaaqqat ilinniartitsisuinut tamanut katersuutsitsilluni seminarertitsisarpoq. Ilinniartitsisunut seminarertitsineq pinerit tamaasa piffimmi nutaami ingerlanneqartarpoq, illoqarfiit tamarmik allanik takutitassaqarlutillu tunniussassaqarput Nakuusaaqqanut tunngatillugu.
Ilinniartitsisunut seminarertitsinerup siunertaraa ilinniartitsisut Nakuusaaqqanik suliaqartut tamaasa katersuutsissallugit, suliamullu tamanut nuna tamakkerlugu attaveqarluarnerunissamik pilersitsinissamik. Atuarfimmi kisimiilluni Nakuusaaqqanik ilinniartitsisuuneq kiserliornarsinnaavoq.
Kisimiinngilatilli. Nakuusaaqqanummi ilinniartitsisut nuna tamakkerlugu 40-ngajaapput, taakkuuppullu suliaqarninni attavissatit, mailerfigeriaannaallutillu sianerfigeriaannaat. Ukiut tamaasa aamma Meeqqat Isummersorfiinut attaveqaataasut arfineq marluusut kommuniminni pingaarutilimmik inissisimaffeqartut aamma aggersartarpagut. Taamaalilluta ilisimasat misilittakkallu ataatsimoortilertarpagut Nakuusaaqqanik meeqqanillu suliaqarnissinni iluaqutigisarsinnaasasi.
Ukiut tamaasa ilinniartitsisunut seminarertitsinermi sammisat nutaanngortuartarput, sammisalli uteqqiasut tassaapput meeqqanik akuutitsineq, qanorlu ililluni ulluinnarmi sulinermi Naalagaaffiit Peqatigiit Meeqqat Pillugit isumaqatigiissusiaat qanoq suliarineqarsinnaanersut. NAKUUSAmi ilinniartitsisut aalajangersumasumik Nakuusaaqqanik suleriuseqassanersut pingaartinngilarput.
Ilinniartitsisut tassaapput atuartitaminnik atuarfimminilu ilisimasaqarnerpaat, tatigivagullu sapinngisartik tamaat nalimmassarumaartut. Taamaammat ilinniartitsisut tamakkerlutik naapitsinnissaat pissanganartuaannarpoq. Nakuusaaqqat qanoq ingerlanneqarsinnaanerannut aamma Naalagaaffiit Peqatigiit Meeqqat Pillugit isumaqatigiissusiaat qanoq ilanngunneqarsinnaanerinut avitseqateqarnissamut periarfissaq annertuvoq.
NAKUUSAp sinnattorivaa Nakuusaaqqat ullut tamarluinnaasa Kalaallit Nunaanni atuarfinni tamani pisinnaatitaaffiit tunngaviusumik ilisimaneqalernissaat qanorlu atornissaat ulluinnaalissasoq.
Taamaammat atuarfissinni Nakuusaaqqat pilersikkusulissagussigit saaffigineqarsinnaavugut uunga info@nakuusa.gl