NAKUUSAp oqaluttuassartaa takorluugaalu

NAKUUSA isumaqarpoq ”Ataatsimoorluta nakuusa” taannaqqissaavorlu inuiaqatigiinnut oqaatiginiagarput.

NAKUUSAp siunertaraa meeqqat inersimasullu akornanni Naalagaaffiit Peqatigiit Meeqqat Pillugit isumaqatigiissusiaanik paasisimasaqarnerulernissaq, taakkualu Kalaallit Nunaanni malinneqarnissaat. Tamassa siullertut isumaqarpoq meeqqat inuusuttullu pisinnaatitaaffiisa piviusunngortinnissaat. Aammali isumaqarpoq meeqqat inuusuttullu najukkaminni nunallu iluani attuumassuteqarfigisaannut tunngatillugit peqataatinneqarlutillu sunneeqataassasut.

NAKUUSA 2010-mi aallartippoq UNICEF Danmarkip Naalakkersuisullu Kalaallit Nunaanni meeqqat inuusuttullu pitsaanerpaamik atugaqarnissaannik qulakkeerinninniarluni suleqatigiiffittut. Suleqatigiinneq aallaqqaammut 2011-miit 2015-p tungaanut ingerlanneqartussaavoq. Kingorna UNICEF Danmark Naalakkersuisullu suleqatigiinnermut isumaqatigiissutaat ukiut tallimakkaarlugit nutarsarneqartarpoq, maannakkullu isumaqigiissut atuuttoq 2025-Ip naanissaata tungaanut atuuppoq. NAKUUSA 2016-imi nunap iluani kommuninut isumaqatigiissutit siulliitt ingerlatilerpaat, tassani Meeqqat Isummersorfiinik pilersitsinissaq siunertaalluni. Kommuninut suleqatigiinnissamut isumaqatigiissutit 2023-mi nutartertussaapput, tassanilu NAKUUSAp pigiliutivinnissaanut Naalagaaffiillu Peqatigiivisa Meeqqat Pillugit Isumaqatigiissusiaa kommunini ulluinnarni atorneqalernissaanut tunngasuuvoq.

NAKUUSA suliniulli aallartimmat angusaqaqaaq, aammali suli pisinnaalunilu angusassasaqaaq. Ullumikkut NAKUUSAp meeqqat peqataatinneqarnissaannik sutigullu tamatigut sammisatigullu oqariartuuteqarnissaannik suliaqarpoq. NAKUUSA isumaqarpoq meeqqat inuusuttullu peqataatinneqarnissaat oqariartuuteqarnissaannut aqqutaasoq – aamma politikkikkut eqqartugassatigut – pitsaanerusumik paasititsiniaanikkut, ilinniartitaanikkut najukkamiillu aallaaveqarnikkut. Taamaammat NAKUUSAp Meeqqat Isummersorfii, meeqqanik inuusuttuaqqanillu 13-nit 17-inut ukiulinnik ilaasortalinnik nuna tamakkerlugu pilersitsivoq, atuarfinnilu amerlanerni Nakuusaaqqat akullerni angajullernilu atuartuusut, aammalu meeqqanik peqataatitsinermut Naalagaaffiillu Peqatigiit Meeqqat Pillugit isumaqatigiissusiaanut tunngasunik ilinniartitsisunut attuumassuteqartunullu pikkorissaanerit ilinniartitsinerillu ingerlattarlugit.

Kikkut tamarmik Naalagaaffiit Peqatigiit Meeqqat Pillugit isumaqatigiissusiaanut malinnittussaapput, ataatsimoorlutalu oqinnerusumik/pitsaanerusumik kivitseqatigiissaagut.

Uani Meeqqat Isummersorfii aamma Nakuusaaqqat paasisaqarfiginerusinnaavatit.

Naalagaaffit Peqatigiit Meeqqat Pillugit Isumaqatigiissusiaat pillugu paasisaqarnerorusuppit?
Taava una tooruk

Angajoqqaatut sulisutulluunniit susassaqartutut qanoq iliorsinnaanerlutit uani paasisaqarnerugit