Nuna tamakkerlugu illoqarfinnit nunaqarfinniillu ilinniartitsisut saaffigisassallu maanna NAKUUSAp ilinniartitsisunut isumasioqatigiissitsinerani Kangerlussuarmi kateripput. Tassani meeqqat pisinnaatitaaffii meeqqanillu peqataatitsineq pillugit ilisimasassanik pissarsissallutik.
Ulluni makkunani nuna tamakkerlugu kommunini tamani atuarfinni ilinniartitsisut saaffigisassallu 38-it NAKUUSAp Kangerlussuarmi ilinniartitsisunik isumasioqatigiissitsinerani katersuupput. Ulluni aggersuni ilinniartitsisut meeqqat pisinnaatitaaffii pillugit ilisimasaqalissapput– Nakuusaaqqallu Meeqqallu Isummersorfii aqqutigalugit meeqqanik peqataatitsinissamut isumassarsisinneqassallutik.
”Nakuusaaqqani ilinniartitsisut saaffigisassallu, meeqqat pisinnaatitaaffimminnik ilisimaarinninnissaannik aalajangiinissanilu namminerminnut pingaaruteqartuni peqataatinneqarnissaannik qulakkeereqataanermikkut, pingaarutilerujussuarmik suliaqarput. Taamaammat UNICEFimiit NAKUUSAmiillu isumasioqatigiinnermi peqataasut peqataasinnaanngitsullu qutsavigerusuppagut,” taama oqarpoq UNICEF-ip Kalaallit Nunaanni allafeqarfiani suliniutinut pisortaq, Tina Dam.
Isumasioqatigiinnermi, meeqqat pisinnaatitaaffii pillugit isumaqatigiissut, meeqqat pisinnaatitaaffii najukkanilu Nakuusaaqqat aqqutigalugit meeqqaanik peqataatitsineq, ilinniartitsisut ilisimasaqarfigilissavaat. Tamatuma saniatigut Peqatigiiffiup Kalaallit Meerartaasa”Tassa!” qulequtsiullugu ilinniartitsinermi atortussat digitaliusut, nakuusernernik aaqqiagiinnginnernillu pitsaaliuinermut tunngasut oqaluttuarissavaat. Atuartut aaqqiagiinnginnernut iliuuseqarfiginninnissamut sakkussinneqassapput, nammineq killissat allallu killissaat ataqqillugit attaveqatigiinneq sungiusassavaat, misigissutsinillu oqimaatsunik oqaasinnguinissamut sakkussinneqassallutik.
Tina Damip peqataasut sammisanik annertuumik pimoorussinerat soqutiginninnerallu erseqqissarpaa:
”Pimoorussineq annertooq ilinniakkamillu tunngaveqarluni peqataasuni oqaloqatigiinnerit pitsaasut misigalugit nuanneqaaq. Ilinniartitsisut siunissamissaaq ilisimasaminnik isumassarsianillu akunnerminni uatsinnullu NAKUUSAmeersunut avitseqateqarsinnaanngorlutik ilinniagaqassutsikkut attaveqatigiinnermik nukittuumik pilersitsisimanissaat, neriuutigaarput,” Tina Dam taama naggasiivoq.