Ukioq manna pisarnertut NAKUUSAp ukiumoortumik meeqqanik ataatsimeersuartitsinerani, nunarput tamakkerlugu meeqqat naapeqatigiissapput. Ukioq manna nutaatut politikerit tjenestemandillu nuimasut arlallit meeqqat oqariartuutaat naalaarniarlugit ataatsimeersuarnermi peqataassapput.
Sineriak tamakkerlugu meeqqat 34-it ulluni makkunani Ilulissani ukiumoortumik ataatsimeesuarnermi- ukioq manna meeqqat internetsimi nittartakkani illersorneqarnissaannik sammisaqarfiusumi- katersuupput.
”Ukioq manna meeqqat ataatsimeersuarneranni, meeqqat inuusuttullu internetsimi nittartakkani illersorneqarnissaasa sammineqarnissaa, Meeqqat Isummersorfiineersut namminneq aalajangerpaat. Silarsuarmi digitaliusumi unammilligassaqarneranik aarlerinartoqarneranillu paasinninnerat, taama toqqaanerisa ersersippaa. Inuit attaveqatigiittarfiinik internetsikkullu tusagassiivinnik annertusiartuinnartumik atuinerup, meeqqat internetsikkut attaveqatigiinnermi isumannaatsumik angalanisamut pisariaqartitanik sakkussaqarnissaannik ilisimasaqarnissaannillu qulakkeerinissaq suli naapertuunnerulerpoq,” Tina Dam Kalaallit Nunaanni UNICEF-ip allaffiani suliniutinut pisortaq oqarpoq.
Nutaatut politikerit pisortallu arlallit ukioq manna meeqqat tusarnaarniarlugit takkupput.
Ataatsimeersuarnermi politikerit immikkut ilisimasalinnit saqqummiivigineqassapput, meeqqanik oqaloqateqassapput meeqqallu inuusuttullu internetsikkut nittartakkani illersorneqarnerunissaannut anguniagassanik tigussaasunik oqaasertaliissallutik.
”Politikerit meeqqat ataatsimeersuarnissaannut qaaqqussummut akuersisimanerat nuannaarutigaarput. Meeqqanik peqataatitsinermik- meeqqallu oqariartuutaannik naalaarnissamik pimoorussineq, tamatuma takutippaa. Internetsikkut nittartakkani innarliinernut misigisanullu allanut nuanniitsunut meeqqat inuusuttullu illersorneqarnerunissaannut, politikkikkut tigussaasunik iliuuseqartoqarumaarnissaa neriuutigalugulu upperaarput,” Tina Dam nassuiaavoq.
Ataatsimeersuarnerup ingerlanerani ukioq manna kingusinnerusukkut Naalakkersuisut siulittaasuannut Múte B. Egede-mut politikerinullu allanut, pisortatigoortumik nalliuttorsiorpalaartumik katerinnermut atatillugu saqqummiussassaminnik tigussasunik, meeqqat innersuussuteqassapput.